Hopp til hovedinnhold

Juoigat – akte Vaanterdimmie saemien musihkesne

Vuasahtalleme Juoigat saemien musihken histovrijem, åtnoem jïh ulmiem goerehte dejnie aerpievuekien vueline/joejkine goh våarome. Gosse akten eatnamasse tjaanga doedterigujmie sæjhta maehtedh dååjredh guktie vuelie/joejke jïh eatneme leah tjarke ektiedamme sinsætnan. Guktie vuelie/joejke maahta dååjresem aktede eatnamistie jallh kreekeste soptsestidh jïh buektedh? Vuasahtalleme stoerrestaaren sïjse jåarhka jïh gellievoetem dehtie aerpievuekien jïh daajbaaletje saemien musihkevuekeste goerehte daan biejjien.


Sveerjesne Karl Tirén (1869 – 1955) fealadimmieh darjoeji gusnie vuelieh våålese tjeelin novtapaehpierisnie. Mijjieh altese baantedimmiejgujmie vuelijste jïh joejkijste åahpenibie aareh 1900-låhkoen, tjoejevuesiehtimmiej jïh daeveri tjïrrh mah leah dotkijen orreme. Vuasahtalleme aaj dam daajbaaletje saemien musihkem gïetede jïh guktie joejke urrebe sjangerinie jïh orrelaakan åtnasåvva, vuesiehtimmien gaavhtan rapesne, populærmusihkesne jïh ektietïjjen musihkesne.

Golken 7.b. 2017 – goevten 6.b. 2018

Laavenjostoe saemien tjiehpiedæjjajgujmie


Vuasahtallemen hammoedimmie dam aerpievuekien saemien våaroeminie åtna jïh akte orretoelhkestimmie saemien vuekijste. Museume göökte saemien tjiehpiedæjjajgujmie laavenjostoe Juoigat-vuasahtallemen sjïekenisnie.

Guvvietjiehpiedæjja, hammoedæjja jïh scenograafe Hilde Skancke Pedersen:

Hilde Skancke Pedersen lea Juoigaten vuasahtallemehammoedæjja. Dïhte reakasovvi Hammerfestesne jïh Guovdageaidnusne årroeminie. Hilde ööhpehtimmiem åtna Tjeahpoejïlleskuvleste Oslosne jïh tjaelijestudijumesne Universiteetesne Tromsøesne. Dïhte visuelle tjiehpiedæjjine jïh kuratovrine barka, jïh lea åehpemes sov tjeahpoeprosjekten åvteste stoerretjåanghkoesavkese jïh foajéese Saemiedigkesne (2001). Dïhte tjaala sceneteeksth teateridie, performance- jïh daanhtsoevuasahtallemidie, jïh scenografijine jïh gaarvoehammoedimmine barka.


Musihketjaelije jïh musihkere Frode Fjellheim:

Frode lea musihkere jïh musihketjaelije åarjelsaemien maadtoste. ïhte lea ööhpehtamme Trøndelag musikkonservatoriumesne jïh Tråantesne årroeminie. 1990-låhkoen raejeste dïhte sov baantine Transjoik bïjre jarkan fealadamme, jïh jïjtse musihkebertemem Vuelie jåhta. Fjellheim lea daelie professovre Nord Universitetesne jïh studijumem Med joik som utgangspunkt stuvrie. Dïhte åehpies ålkoelaantesne sjïdti gosse rïhpestimmielaavlomem darjoeji Disney-filmese Frost (2013).

  • 1/1

Tråante 2017

Saemiedigkie, Åarjel-Trööndelagen jïh Noerhte-Trööndelagen fylhkentjïelth jïh Tråanten tjïelte leah ektesne aktem vihkeles heannadimmiem saemiej histovrijisnie mïerhkesjamme. Daan jaepien 100 jaepiej juassah dïhte voestes saemien rijhketjåanghkoe lij Tråantesne goevten 6.b. 1917. Mïerhkesjimmie Tråante 2017 akte nasjonaale aavoedimmieh jïh akte ektie saemien heevehtimmie. Ulmie heevehtimmine Tråante 2017 lea daajroem saemiej, saemien kultuvren jïh saemien histovrijen bïjre mïerhkesjidh jïh åehpiedehtedh aktene 100-jaepien perspektijvesne. Heevehtimmiemïerhkesjimmie sæjhta abpe 2017 årrodh joekehts sijjine Saepmesne ovmessie öörnedimmiejgujmie jïh mïerhkesjimmiejgujmie. Gellievoete programmesne edtja dam gamtoem vuesiehtidh mij saemien kultuvresne gååvnese.

Lohkh vielie daesnie: tråante2017.no

Museum24:Portal - 2024.03.19
Grunnstilsett-versjon: 1